අද අපි ඔබට කියන්න යන්නේ තුර්කියේ එක්තරා කුඩා නගරයක සිදු වූ හරිම අපූරු සිදුවීමක් ගැනයි. මේ කතාවේ ප්රධාන චරිතය වෙන්නේ ජර්මන් ෂෙපර්ඩ් වර්ගයේ හරිම බුද්ධිමත් මෙන්ම කරුණාවන්ත සුනඛයෙක්. ඔහුගේ නම ඇලෙක්ස්. ඇලෙක්ස්ගේ තිබුණු අහිංසක සහ සුහදශීලී ගතිගුණ නිසාම පාරේ යන එන හැමෝම වගේ ඇලෙක්ස් ළඟ නතර වෙලා, ඔහුත් එක්ක පොඩ්ඩක් කතා කරලා, ඔළුව අත ගාලා යන්න කිසිම වෙලාවක අමතක කළේ නැහැ.
මේ සුනඛයාගේ අයිතිකාරිය වුණේ අයිරිනා නමැති කාන්තාවක්. අයිරිනා හැමදාම වගේ හවස් වරුවට ඇලෙක්ස් එක්ක නගරයේ ඇවිදින්න යන්න පුරුදු වෙලා හිටියා. නමුත් එක්තරා සුවිශේෂී දවසක ඇලෙක්ස් වෙනදාට වඩා සම්පූර්ණයෙන්ම වෙනස්, අමුතුම විදිහක හැසිරීමක් පෙන්නුම් කරන්න පටන් ගත්තා.එදා අයිරිනා තමන්ගේ සුරතලා එක්ක සුපුරුදු පරිදි ඇවිදගෙන යද්දී, මස් කඩේ ඉඳන් සැතපුම් කිහිපයක් ඈතින් තිබුණු එක්තරා ස්ථානයක ඇලෙක්ස් එකපාරටම නතර වුණා. ඉන්පසු ඔහු එම ස්ථානයේ තිබූ විශාල කානු දොරටුවක් දෙසට හැරී ඉතාමත් නොසන්සුන් ලෙස බුරන්නට පටන් ගත්තා.
ඇලෙක්ස් කොච්චර හයියෙන් සහ දරුණු විදිහට බිරුවද කියනවා නම්, ඒ අසලින් ගිය පදිකයන් පවා බියට පත් වුණා. තම සුරතලා කවදාවත් මේ වගේ නොහික්මුණු විදිහට හැසිරී නොතිබුණු නිසා අයිරිනා දැඩි ලෙස කලබලයට පත් වුණා. ඇය ඔහුව එම ස්ථානයෙන් ඉවත් කර ගන්න වගේම නිශ්ශබ්ද කරන්න උපරිම උත්සාහ කළත්, ඇලෙක්ස් අඟලක්වත් සෙලවුණේ නැහැ.
ඔහු දිගින් දිගටම කානු දොරටුව දෙස බලමින් මුළු ශක්තියම යොදා බුරන්නට වූයේ එහි යම්කිසි අභිරහසක් ඇති බව අඟවමින්. වෙනදාට හරිම කීකරු, බුද්ධිමත් සතෙක් මෙච්චර අමුතු විදිහට හැසිරෙන්නේ ඇයිද කියා සිතාගත නොහැකිව අයිරිනා මෙන්ම එම සිදුවීම ඇස් දෙකෙන් දැකපු අවට සිටි හැමෝම පුදුමයට පත් වුණා.
වාසනාවට ටික වෙලාවක් මෙහෙම කානුව දිහා බලාගෙන බුර බුරා ඉඳලා බල්ලා නැවත සාමාන්ය තත්වයට පත් වුණා. එයින් අයිරිනාට විශාල සහනයක් දැනෙන්නට වුණා. ලැබුණු අවස්ථාවෙන් වහාම ක්රියාත්මක වෙච්ච අයිරිනා, ඇලෙක්ස්ව ඉක්මනින් නැවත නිවසට එක්කන් ගියා. හැබැයි අයිරිනා මුහුණ දුන් ඒ සිදුවීම නිවසට ගිය පසුත් ඇයගේ හිතට දැඩි ලෙස වද දෙන්නට වුණා. අර පාරේ කානුවක් ළඟ ඇලෙක්ස් දැක්වූ අමුතු හැසිරීමට හේතුව මොකක් වෙන්න ඇතිද කියන ප්රශ්නය නිතර නිතර ඇයට මතක් වුණා.
අවසානයේ ඇය මේ පිළිබඳව ඇයගේ සැමියා වන රොන් සමඟ සාකච්ඡා කළා. නමුත් එදා හවස සිදුවූ සිදුවීම රොන් විසින් සියසින් දැක තිබුණේ නැති නිසා අයිරිනා කියපු දේ ඔහු එතරම් ගණන් ගත්තේ නැහැ. ඒ පිළිබඳව කිසිම උද්යෝගයක් හෝ උනන්දුවක් ඔහුට දැනුණේ නැහැ. "ඒ ගැන ලොකුවට කරදර වෙන්න එපා, ඇලෙක්ස් ඔය කානුවේ ඉන්න පොඩි මීයෙක් දකින්න ඇති," ඔහු අයිරිනාට පැවසුවේ සැහැල්ලුවෙන්. පසුදා උදෑසන එම සිදුවීම ගැන අනවශ්ය ලෙස සිතීම අත්හැරිය යුතු බව ඇයට වැටහුණා. මෙසේ කාලය ගෙවී ගොස් නැවතත් සවස් යාමය උදා වුණා. අයිරිනා නැවතත් තම සුනඛයා සමඟ අසල්වැසි ප්රදේශය වටා ඇවිදින්නට ගියා. හැබැයි මෙවර අයිරිනා විශේෂ අවධානයකින් තමයි ඇලෙක්ස්ව රැගෙන ගියේ.
සෙමින් සෙමින් ඔවුන් පසුගිය දින ඇලෙක්ස් අමුතු විදිහට හැසිරුණු කානුව දෙසට ළඟා වුණා. අයිරිනා ඇලෙක්ස්ව කානුව අසලටම ගෙන ගියා. හරිම පුදුම සහගත ලෙස මෙවර නම් ඔහුගේ හැසිරීම සම්පූර්ණයෙන්ම වෙනස් ස්වරූපයක් ගත්තා. ඇලෙක්ස් කානුව ළඟට ආවාට පස්සේ බුරන්න පටන් ගත්තේ නැහැ. ඒ වෙනුවට ඔහු කානුව අසල ඉතාමත් බරපතළ ලීලාවෙන් වාඩිවෙලා, විනාඩි කිහිපයක් ඇඟිල්ලක්වත් හෙල්ලෙන්නේ නැතුව කානුව දෙස බලා සිටින්නට වුණා. නැවත වරක් බල්ලාගේ මේ අමුතු හැසිරීම අයිරිනාව පුදුමයට පත් කළා.වහාම අයිරිනා කානුව ඇතුළට හා එයාගේ දෑසට පෙනෙන ප්රදේශය හොඳින් නිරීක්ෂණය කළා.
නමුත් ඇයට එහි කිසිවක් දැකගන්නට ලැබුණේ නැහැ. මේ විදිහට ඇලෙක්ස් දවස් තුනක් එක දිගට මේ කානුව ළඟට පැමිණ, කිසිදු හඬක් නොනඟා ඒ දෙසම බලා සිටින්නට පුරුදු වුණා. මේ අතරේ එක්තරා සන්ධ්යාවක අයිරිනා තම සුනඛයා සමඟ ඔවුන්ගේ සුපුරුදු ඇවිදීමේ මාර්ගයේ ගමන් කරමින් සිටියා. එදින මස් කඩේ ළඟට පැමිණි පසු අයිරිනා ඇලෙක්ස්ට ඔහු ඉතාමත් ප්රිය කරන සොසේජස් පැකට්ටුවක් මිලදී ගෙන දුන්නා. වෙනදා නම් සොසේජස් දුන් සැණින් එතැනම ඉඳන් ඒවා කා දමන ඇලෙක්ස්, එදා කවදාවත් නොකරපු අමුතුම දෙයක් කරන්න පටන් ගත්තා.අයිරිනා සොසේජස් පැකට්ටුව කැපූ සැණින්ම, ඇලෙක්ස් එය කටින් අල්ලාගෙන අර කානුව දෙසට වේගයෙන් දුවන්න වුණා.
කලබලයට පත් වූ අයිරිනාද ඇලෙක්ස්ගේ පසුපසින් දිව ගියා. කානුව අසලට දිව ගිය ඇලෙක්ස් සොසේජස් පැකට්ටුවට කරපු දේ දැකපු අයිරිනාට ඇගේ ඇස් අදහාගන්නට බැරි වුණා. ඇලෙක්ස් කානුව ළඟට ගොස් සොසේජස් පැකට්ටුව කටේ තබාගෙන එය අසල වාඩි වී සිටි නමුත්, ඔහු ඉන් එකදු සොසේජස් එකක්වත් අනුභව කළේ නැහැ. එක්වරම එතැන සිදු වූයේ නොසිතූ දෙයක්. ඇලෙක්ස් තමන්ට ලැබුණු පැකට්ටුවෙන් සොසේජස් එකින් එක එළියට ගෙන ඒවා කානුව තුළට විසි කිරීමට පටන් ගත්තා.
ඔහු මේවා කා වෙනුවෙන් විසි කරන්නේදැයි දැනගැනීමේ දැඩි වුවමනාවෙන් අයිරිනා කානුව ඇතුළට විපරම් කර බැලුවත්, මුල් අවස්ථාවේදී ඇයට කිසිම හෝඩුවාවක් ලැබුණේ නැහැ.
අවසානයේ ඇලෙක්ස් පැකට්ටුවේ තිබූ සියලුම සොසේජස් කානු ආවරණයේ සිදුරු අතරින් කානුව ඇතුළට දමා අවසන් කළා. තම ආදරණීය සුනඛයාගේ මේ අසාමාන්ය හැසිරීම දින කිහිපයක් තිස්සේ එක දිගට අත්විඳිමින් සිටි අයිරිනාගේ කුතුහලය දැන් උපරිම තලයට පැමිණ තිබුණා. "මේ කානුව ඇතුළේ මොකක් හරි ලොකු අභිරහසක් තියෙන්නම ඕනෑ" යන්න තේරුම් ගත් ඇය, වහාම ක්රියාත්මක වී බිම වැතිරී කානුවේ අභ්යන්තරය ඉතාමත් සියුම් ලෙස පරීක්ෂා කරන්නට පටන් ගත්තා. එලෙස හොඳින් විපරම් කර බැලීමේදී ඇයට එහි දකින්නට ලැබුණු දෙයින් ඇය මහත් සේ කම්පනයට පත් වුණා. තවදුරටත් ප්රමාද නොවූ අයිරිනා වහාම ඇගේ ජංගම දුරකථනය ගෙන, එරට හදිසි ගලවා ගැනීමේ සේවාවට හා ගිනි නිවන දෙපාර්තමේන්තුවට ඇමතුමක් ලබා දුන්නා.
ඇගේ ඇමතුමෙන් මිනිත්තු පහළොවකට පමණ පසු හදිසි සේවා නිලධාරීන් කණ්ඩායමක් එම ස්ථානයට ළඟා වුණා. අයිරිනා සිදු වූ සියලුම විස්තර සහ ඇය දුටු දේ ඔවුන් වෙත පැහැදිලි කළා. තත්ත්වය තේරුම් ගත් නිලධාරීන් වහාම ක්රියාත්මක වී, කානු ආවරණය ඉවත් කර එහි අභ්යන්තරයට බැසීමට තීරණය කළා. හැබැයි මෙතනදී මේ සත්වයා බියජනක ලෙස ගොරවමින් කානුව ළඟට නොයන ලෙස අනතුරු අඟවන්නට පටන් ගත්තා.
මේ තත්ත්වය දිගු වේලාවක් පැවති අතර කෙසේ හෝ ඇලෙක්ස්ව අර කානුව ළඟින් අඩි කිහිපයක් ඈතට ගන්න අයිරිනාට පුළුවන්කම ලැබුණා. ඊට අවසරයෙන් වහාම ක්රියාත්මක වූ ගලවා ගැනීමේ නිලධාරීන් කානුව ආවරණය කර තිබූ ගේට්ටුව ඉවත් කළා. දැන් කානුව ඇතුළ හැමෝටම හොඳින් පෙනෙනවා. මේ වෙලාවේදී මේ ස්ථානයට විශාල සෙනඟක් එකතු වෙලා හිටියා. ඒ හැමෝම ඇලෙක්ස් දෙසත්, කානුව අභ්යන්තරය දෙසත් බොහෝම කුතුහලයකින් බලාගෙන තමයි හිටියේ. විනාඩි කිහිපයකට පස්සේ ගලවා ගැනීමේ නිලධාරීන්, මෙච්චර දවසක් ඇලෙක්ස් කානුව ළඟ බලා සිටිමින් ආරක්ෂා කරපු ඒ රහස ලෝකයට හෙළි කරනවා. ඇලෙක්ස් මෙච්චර දවසක් ආරක්ෂා කරන්න උත්සාහ කරලා තියෙන්නේ හරිම හුරතල් කුඩා පූස් පැටියෙක්.
මේ සතාට සති කිහිපයකට වඩා වයසක් නැහැ. හැබැයි ටික වේලාවකින් හැමෝම ඊටත් වඩා කම්පනයට පත් වුණු තවත් දෙයක් සිද්ධ වුණා. ඇත්තටම කානුව ඇතුළේ හිටියේ එක් පූස් පැටියෙක් විතරක් නෙවෙයි; තවත් පූස් පැටවුන් හතර දෙනෙක්ම ඇතුළේ හිරවෙලා ඉන්නවා කියලා ආරක්ෂක නිලධාරීන් සොයාගන්නවා. මේ දුප්පත් සතුන් දවස් තුනක්, සමහරක් විට ඊටත් වඩා වැඩි කාලයක් කානුවේ හිරවෙලා තමයි ඉන්න ඇත්තේ. ඒ බව දැනගත් හැමෝගෙම හිත්වල ලොකු කණගාටුවක් ඇති වුණා.
හැබැයි බුද්ධිමත් මෙන්ම කරුණාවන්ත ඇලෙක්ස් නිසා මේ අහිංසක ජීවිත ටික කොහොම හරි බේරාගන්නට පුළුවන් වුණු එක ගැන එතැනට රැස්වෙලා හිටපු හැමෝටම දැනුණේ මුළු හදවතින්ම ඇති වූ ලොකු සහනයක් සහ සතුටක්. ගලවා ගැනීමේ නිලධාරීන් ඒ පූස් පැටවුන්ව වහාම පශු වෛද්ය සායනයට රැගෙන ගියා. එහිදී ඔවුන්ව මූලික වෛද්ය පරීක්ෂණ රැසකට ලක් කෙරුණා.
ඉන් පසුව සතුන්ගේ වැඩිදුර ආරක්ෂාව වෙනුවෙන් ඔවුන්ව විශේෂ සත්ව නවාතැනක් වෙත මාරු කර යවනු ලැබුවා. මේ පූස් පැටවුන් මේ සා විශාල ජලාපවහන පද්ධතියක් ඇතුළට ගියේ කොහොමද කියලා නම් කවුරුත් හරියටම දැනගෙන හිටියේ නැහැ. නමුත් ඔවුන් බොහෝ විට නගරයට ඇද හැළුණු තද වැස්සක් අතරතුර එහි ගසාගෙන යන්නට ඇති කියලා තමයි හැමෝම අනුමාන කළේ.
කොහොම වුණත්, මේ කළ වීර ක්රියාව වෙනුවෙන් ඇලෙක්ස්ට මුළු නගරය ඇතුළේම ලොකු ප්රසිද්ධියක් වගේම ඉහළ ඇගයීමකුත් ලැබුණා. ඉතින් මේ අපූරු සත්ය සිදුවීමත් එක්ක අපිට අපේ ජීවිතවලට ඉගෙන ගන්න දේවල් ගොඩක් තියෙනවා. විශේෂයෙන්ම, අපි අපේ නිවෙස්වල ඇති දැඩි කරන ආදරණීය සුරතල් සතුන්ගේ ආරක්ෂාව වගේම අවට සිටින අසරණ සතුන්ගේ ආරක්ෂාව ගැනත් මීට වඩා හොඳින් සොයා බැලීමට අප වගබලා ගත යුතුමයි.
Comments
Post a Comment